లక్షల ఆశ చూపి.. మత్తులో ముంచి! వివాహితపై దారుణం
పంజాగుట్ట, హైదరాబాద్: రోజుకు లక్ష రూపాయల ఆదాయం వస్తుందని ఆశజూపి ఓ వివాహితను వంచించిన వైనం హైదరాబాద్లో వెలుగుచూసింది. ఆర్థిక ఇబ్బందులను ఆసరాగా చేసుకుని ఆమెను నమ్మించి, మత్తుమందు ఇచ్చి అసభ్య చిత్రాలు చిత్రీకరించిన ఘటన కలకలం రేపుతోంది.
పోలీసుల కథనం ప్రకారం.. విశాఖపట్నంకు చెందిన సదరు మహిళకు నిందితుడు పరిచయమయ్యాడు. ‘ఆ చిత్రాల్లో’ నటిస్తే భారీగా సంపాదించవచ్చని మాయమాటలు చెప్పాడు. ఆర్థిక ఇబ్బందుల్లో ఉన్న బాధితురాలు అతని మాటలు నమ్మి నగరానికి వచ్చింది. పంజాగుట్టలోని ఒక హోటల్కు ఆమెను రప్పించిన నిందితుడు, మాటల మాయలో పడేశాడు. అనంతరం కూల్డ్రింక్లో మత్తుమందు కలిపి ఇచ్చాడు.
బాధితురాలు స్పృహ కోల్పోయిన సమయంలో ఆమెకు తెలియకుండానే అసభ్యకర వీడియోలు చిత్రీకరించాడు. స్పృహలోకి వచ్చిన తర్వాత ఆ దృశ్యాలను చూపించి బ్లాక్మెయిల్కు దిగాడు. భారీగా నగదు డిమాండ్ చేయడమే కాకుండా, పోలీసులకు చెబితే వీడియోలను సామాజిక మాధ్యమాల్లో పెడతానని బెదిరించాడు. దీంతో బాధితురాలు పంజాగుట్ట పోలీసులను ఆశ్రయించింది. కేసు నమోదు చేసిన పోలీసులు నిందితుడి కోసం గాలిస్తున్నారు.
#Hyderabad #CrimeNews #WomenSafety #Visakhapatnam