హైదరాబాద్: “భారతదేశానికి ఓ రోజు హిజాబ్ ధరించిన మహిళ ప్రధానమంత్రి అవుతుందనే కలను నేను కంటున్నాను” అని ఎంఐఎం అధినేత అసదుద్దీన్ ఒవైసీ ఆశాభావం వ్యక్తం చేశారు. ఈ సందర్భంగా పొరుగు దేశమైన పాకిస్థాన్ రాజ్యాంగానికి, భారత రాజ్యాంగానికి మధ్య ఉన్న మౌలిక వ్యత్యాసాలను ఆయన వివరించారు.

రాజ్యాంగ స్ఫూర్తితోనే సాధ్యం:
పాకిస్థాన్ రాజ్యాంగం ప్రకారం ఒక నిర్దిష్ట మతానికి చెందిన వారికే ఆ దేశంలోని అత్యున్నత పదవులు దక్కే అవకాశం ఉందని ఆయన గుర్తు చేశారు. అయితే “బాబాసాహెబ్ అంబేద్కర్ రూపొందించిన భారత రాజ్యాంగం మాత్రం అలాంటి వివక్షకు తావులేకుండా ప్రతి పౌరుడికీ సమాన అవకాశాలు కల్పించింది” అని ఆయన స్పష్టం చేశారు. భారత రాజ్యాంగంలోని లౌకిక స్ఫూర్తి వల్లనే ఏ పౌరుడైనా ప్రధాని, రాష్ట్రపతి, ముఖ్యమంత్రి వంటి అత్యున్నత పదవులను అధిష్టించే హక్కు పొందుతున్నాడని పేర్కొన్నారు.

భవిష్యత్తుపై ధీమా:
“ఇన్షా అల్లాహ్… రాబోయే రోజుల్లో ఒక హిజాబ్ ధరించిన కుమార్తె ఈ దేశానికి ప్రధానమంత్రి అవుతుంది. ఆ రోజున మనం ఉండకపోవచ్చు. కానీ ఆ మార్పు మాత్రం తప్పకుండా వస్తుంది” అని ఒవైసీ ధీమా వ్యక్తం చేశారు.